លោកអាប់ភីស៊ីត មានការព្រួយបារម្ភ ជាថ្មីក្រោយពីការផ្ទុះគ្រាប់បែកច្នៃមួយ
នាយករដ្ឋមន្ដ្រីថៃ លោកអាប់ភីស៊ីត វ៉េចាជីវ៉ា ពេលនេះមានការព្រួយបារម្ភជាថ្មីម្ដងទៀត ក្រោយពីមានការបំផ្ទុះគ្រាប់បែកច្នៃមួយគ្រាប់នៅក្បែរស្នាក់ការ កណ្ដាលគណបក្ស Bhumjaithai កាលពីថ្ងៃទី២២ មិថុនា កន្លងមក ។ មជ្ឈមណ្ឌលស្វែងរកដំណោះ ស្រាយសំរាប់ស្ថានភាពគ្រាអាសន្ន (CRES) ដែលស្ថិតក្រោមការគ្រប់គ្រងរបស់លោកនាយករដ្ឋមន្ដ្រីអាប់ភីស៊ីត និយាយថា ការ បំផ្ទុះគ្រាប់បែកនៅក្បែរស្នាក់ការណ្ដាលគណបក្ស Bhumjaithai នោះគឺក្នុងគោលបំណងបង្កភាពចលាចលជាថ្មីទៀត ហើយអាចប៉ះពាល់ដល់ការសំរេចចិត្ដលុបចោលច្បាប់គ្រាអាសន្ន ។ លោក Sansern Kaewkamned ជាអ្នកនាំពាក្យមជ្ឈមណ្ឌលស្វែងរកដំណោះស្រាយសំរាប់ស្ថានភាពគ្រាអាសន្ន ថ្លែងថា ការបំផ្ទុះ គ្រាប់បែកនោះគឺជាការផ្ទុះរទេះលក់ផ្លែឈើមួយ ដោយបុរសម្នាក់បានសារភាពថា រូបគេមិនមែនជាម្ចាស់រទេះផ្លែឈើនោះទេ តែត្រូវបានគេជួលឱ្យយកប្រេងសាំងច្រកដបជ័រ ហើយដាក់រំសេវបន្ទាប់មកយកទៅដាក់បំផ្ទុះនៅក្រោមរទេះផ្លែឈើដែល ដាក់នៅក្បែរស្នាក់ការកណ្ដាលគណបក្ស Bhumjaithai បណ្ដាលឱ្យរូបគេរងរបួសធ្ងន់ធ្ងរ ។ លោក Sansern ថ្លែងទៀតថា ការបំផ្ទុះនោះអាចជាប់ទាក់ទងទៅនឹងភាពចលាចលផ្នែកនយោបាយកាលពីពេល ថ្មីៗកន្លងមក ហើយការផ្ទុះនោះអាចប៉ះពាល់ដល់ការពិចារណាពីការលុបចោលវិញច្បាប់ គ្រាអាសន្ន ។ ជាមួយគ្នានេះដែរ លោកនាយករដ្ឋមន្ដ្រីអាប់ភីស៊ីត បានបដិសេធភ្លាមៗថា រដ្ឋាភិបាលរបស់លោកមិនមានជាប់ពាក់ព័ន្ធជាមួយការបំផ្ទុះគ្រាប់ច្នៃ លើកចុងក្រោយនេះទេ ដោយថ្លែងថា ការផ្ទុះនេះបង្ហាញឱ្យឃើញយ៉ាងច្បាស់ថា ស្ថានការណ៍នៅក្នុងប្រទេសថៃពុំមានប្រក្រតីភាពឡើងវិញនៅឡើយទេ ដូច្នេះច្បាប់គ្រាអាសន្នក៏មិនទាន់លុបចោលបានដែរ ៕ជីវិតមនុស្សនិងផ្ទះ២ខ្នង ត្រូវរថយន្តលាយស៊ីម៉ងត៍បុកខ្ទេច
បាត់ដំបង ៖ ស្រ្តីម្នាក់បានរងរបួសយ៉ាងធ្ងន់ធ្ងរ រហូតបាក់ភ្លៅទាំង២ ខណៈពេលដែលមាន រថយន្តលាយស៊ីម៉ងត៍១គ្រឿង បើកបរធ្លាក់ផ្លូវទៅកិនដល់ក្នុងផ្ទះរហូតខ្ទេចខ្ទីអស់តែម្ដង។
ហេតុការណ៍ដ៏ព្រឺព្រួច នោះបានកើតឡើង នៅវេលាម៉ោង ១៤និង១៥នាទី ថ្ងៃទី២២ ខែមិថុនា ឆ្នាំ២០១០ ពេលភ្លៀងកំពុងតែធ្លាក់។ ករណីរថយន្តដែលបង្កហេតុនោះស្ថិតក្នុងក្រុមទី១ ភូមិអង្គ សង្កាត់អូរចា ក្រុងបាត់ដំបង ខេត្តបាត់ដំបង។
លោកម៉ី លី អាយុ៦១ឆ្នាំ មានមុខរបរជាជាងជួសជុលម៉ូតូ នៅត្រង់ចំណុចកើតហេតុបានរៀប រាប់ថា នៅពេលនោះលោកបានឃើញរថយន្តបង្កបានបើកបរ មកពីទិសខាងត្បូងចេញពីផ្លូវវាងក្រុង យ៉ាងលឿនរួចឆ្លងកាត់ថ្នល់តម្រង់មករកផ្ទះរបស់គាត់តែម្ដង ដោយពេលនោះគាត់កំពុងអង្គុយនៅ ខាងមុខផ្ទះ។ បន្ទាប់មកក៏បុកទាំងកំរោលទៅលើផ្ទះរបស់គាត់ ព្រមទាំងកិនលើប្រពន្ធរបស់គាត់ ឈ្មោះម៉ា កៀន អាយុ៥៩ឆ្នាំ ខណៈពេលដែលកំពុងដឹកកង់នៅក្នុងផ្ទះ។ គ្រាន់តែឮសម្រែកប្រពន្ធ របស់គាត់ស្រែកមួយម៉ាត់ប៉ុណ្ណោះ រថយន្តក៏ជ្រុលទៅមុខទៀត ហើយបុកទៅលើផ្ទះមួយខ្នងទៀត ដែលជាកន្លែងដាក់លក់សម្ភារៈអគ្គិសនី ព្រមទាំងបុកទល់នៅនិងរថយន្តកាមរីឆ្លាមពណ៌ស ១គ្រឿង ទើបឈប់។ ផ្ទះនិងរថយន្តនោះជាកម្មសិទ្ធិរបស់ឈ្មោះគិត ហូវ ភេទប្រុស អាយុ៤៣ឆ្នាំ។
ប្រជាពលរដ្ឋបាននិយាយ ថា ភ្លាមៗនោះ គេឃើញអ្នកបើកបរវ័យក្មេងបានបើកទ្វាររត់សំដៅ ទៅថ្នល់ព្រមទាំងស្រែកថា សុំទោសខ្ញុំងងុយដេក ប៉ុន្តែពេលនោះកូនស្រី្តរងគ្រោះបានដេញតាមចាប់ យកមកប្រគល់ឲ្យកំលាំងកងរាជអាវុធហត្ថក្រុង ដើម្បីរង់ចាំការដោះស្រាយ។
ដោយឡែកស្រ្តីរង គ្រោះត្រូវបាននគរបាលចរាចរជួយបញ្ជូនទៅកាន់មន្ទីរពេទ្យ ដើម្បីធ្វើការ សង្រ្គោះបន្ទាន់ព្រោះមានសភាពធ្ងន់ធ្ងរ។
បច្ចុប្បន្ន រថយន្តបង្កនោះត្រូវបានសមត្ថកិច្ចស្ទូចតាមបច្ចេកទេស ព្រោះរថយន្តនោះបុកដាច់ សសរទាំងអស់ បើមិនដូច្នោះទេ ប្រាកដជាត្រូវរលំខ្ទេចខ្ទីទាំងអស់ ព្រមទាំងសង្កត់លើរថយន្តកាមរី បន្ថែមទៀត៕
